Mbak Kanti,
Berat pasti beban dan rasa sakit yang mbak tanggung sampai mbak gelap mata untuk menciderai ke-3 buah hati. ðŸ˜ðŸ˜ðŸ˜
Gak bermaksud membenarkan, cuman gimane ye. Kejadian tragis begini kan gak ujug-ujug dateng gituh ajeh. Pasti ade pangkalnye.
Yuks mulai perhatikan sekitar kita, gaes.
Kalo denger ade perempuan yang ditinggalin suami, ditemenin. Jangan dinyinyirin. Jangan dighibahin. Meski dalam sudut pandang kita misalnye si istri bersalah, stop judging. Kenape? Karena kite gak tauk masalah ape yang sebenernye terjadi.
Apelagi kalo cuman denger dari mulut ke mulut. Inget ajah kalo omongan yang keluar dari mulut kite, bise jadi pemicu depresi seseorang. Bisa jadi penambah rasa sakit orang.
Kalo ade perempuan yang ditelantarin suami dan kebingungan nyari nafkah sendiri terus punye banyak utang, ye dibantuin. Jangan dinyinyirin. Jangan dighibahin. Jangan ngatain die pemalas, kurang usaha, kurang niat, kurang kuat, demen ngemis, dll.
Kalo kite mau bantu ye bantu ajeh. Kalo mau ngasih utang ye utangin ajah. Kalo gak mau atau gak bisa ngasih yaudeh diemin. Jangan nambah berat bebannye dengan ape-ape yang kite keluarin dari mulut kite.
Kalo ade perempuan ngerasa gak disayang suami terus curhat, ye dengerin. Kadang cukup dengan jadi pendenger ajah kite tuh udeh bisa ngeringanin rasa di hatinye. Gak perlu jadi Maria Teguh atau Mamah Dadah.
Jangan jugak malah dijudge kurang sabar, kurang bersyukur, gak tauk diri, gak pinter bawa diri, manja, cengeng, atau ngasih toxic positivity yang malah bikin die mangkin gak enak hati.
Dan kalo kite denger ade kisah-kisah kayak Mbak Kanti, pliss deh. Tahan jari buat ngatain orang lain kurang iman, kurang sabar ngadepin permasalahan dunia, goblok, gak berjuang, begitu doang gak sanggup, dan sejenisnye.
Astaghfirullah geregetan aye baca komen-komen begitu. Ape iye nyisanak udeh ngerasa segitu tebel imannye sampe tega bilang: "Kasihan kena gangguan jiwa hanya karena permasalahan dunia." Astaghfirullah.
Hati-hatilah.
Iblis tuh kepeleset dari sorga ke neraka karena die ngerasa lebih baek, lebih kuat, lebih hebat. Dan orang yang sombong itu gak bise nyium wangi sorga.
Dan buat Bapak-Bapak jugak, yee.
Kudunye lu tuh pade jadi lakik pas denger tragedi macem gini tuh mangkin mawas diri. Langsung temuin istri, kasih perhatian, tanyain keadaannye, tanyain die idup bareng lu tuh hatinye seneng gak? Jiwanye tentrem gak? Kebutuhannye kecukupan gak? Keinginannye terpenuhi gak? Mangkin bahagia ape sumpek kalo liat elu?
Malah jangan lu ikutan nyinyirin istri orang yang lagi depresi. Masih mending kalo lu sebagai lakik tuh nyinyirin lakiknye Mbak Kanti. Lah, kalo lu malah nyerang Mbak Kantinye ntu namanye lu yang gilak! Lu yang gak punye otak dan lu yang gak punye rasa! Ngerti luh?!
Astaghfirullah.
Naek tensi aye!
(Aisha Rara)
